مرثية إلى أطفال فلسطين..
بقلم دكتور محمد صلاح غانم
مسك القلم
غمسة في دم أبوه الشهيد
شخبط على الكراس بإيد
ورسم علم
وبتاني إيد مسك الحجر
حدفه على مرمى البصر
وساعتها حس بقوته
من فرحته
شد العلم من رسمته
رفع العلم
كان حلم عمره تلات حروف
بيكونوا كلمة وطن
ووطن ف نظرة وببساطة يعني بيت
وشجر زتون
وحمام بيسرح في البراح
سمع صراخ أمه العجوز
م الحلم فاق
وساعتها حس إنه انظلم
مسك القلم
غمسه ف دم أمه ودم أبوه الشهيد
شخبط على الكراس بإيد
ورسم علم
وبتاني إيد مسك الحجر
حدفه على مرمى البصر
وساعتها حس بقوته
من فرحته
شد العلم من رسمته
رفع العلم
قال لسه بحلم طول ما فيه نفس وروح
والشمس طول ما بتتولد مع كل يوم
فأكيد هييجي اليوم واضمك يا وطن
وأخدك في حضني وألف بيك وامرجحك
فتح دراعاته عشان يحضن وطن
رشقت رصاصة في سدره مات
وقع العلم
وطي أخوه مسك القلم
غمسه ف دم امه ودم أبوه ودم أخوه الشهيد
شخبط على الكراس بإيد
ورسم علم
وبتاني إيد مسك الحجر
حدفه على مرمى البصر
وساعتها حس بقوته
من فرحته
شد العلم من رسمته
رفع العلم
