تقارير
وحشني صوتك
بقلم/ريهام طارق
وحشني صوتك
خدتنا الدنيا أكتر من اللازم
فرقت بينا وبين حبايبنا حرمتنا من اللمه الحلوه
واعده العيله علي السفره يوم الجمعه في بيت العيله
بقينا نكسل حتي نتكلم ونسمع بعض بقينا بنجري والدنيا كلها بتجري ورانا اصبحنا في سباق مع لقمه العيش
اختفي الاب إللي بيتكلم مع ولاده ويعرف اخبارهم
وانقرضت الأم إللي بتنيم ولادها وتحكي حدوته قبل النوم
صحابنا بقينا بنعرف اخبارهم من السوشيال ميديا
بقينا نتخض لو لقينا حد بيكلمنا بدل ما نقول وحشتنا بنقول خير أنت كويس
حتي لو اتقابلنا بطلنا نتكلم ونسمع بعض
إحنا بقينا صم وبكم
إحنا اعدين في البيت فاضين محبوسين زهقانين
أمسك موبايلك وأسأل علي قريبك أو صاحبك أو جارك إللي بقالك سنين مسمعتش صوته ولا سالت عليه
وكنت بتكتفي برساله الواتس أب أو صوره علي الماسنجر
أتصل واسمع صوته هيفرق كتير صدقوني
واتصل وقوله واحشني صوتك
