علاج الوهم والاكتئاب في كلمه واحده
قلم/ريهام طارق
في وهم كبير عند كتير من الناس اسمه اكتئاب….
مافيش حاجه اسمها كده ده اسمه ياس او استسلام لواقع معين مطلع عين اهلك خد قرار واجمد وانشف وادي نفسك اوردر انا مش هزعل انا مش هتخنق لو انت مش هتقدر تطلع نفسك من اللي انتي فيه مافيش حد في الدنيا هيقدر يطلعك او يساعدك
كل اللي حواليك ممكن تكون اسباب ثانويه لخروجك من الازمه لكن انت يا بطل الاساس
بلاش تعيش دور الضحيه او تتلذذ بدور المظلوم
في الوقت اللي انت حارق نفسك ودمك وعمرك فيه هو نفس الوقت اللي فيه الناس اللي كانوا اصلا سبب في كل ده عايشين حياتهم ومبسوطين وصوت ضحكهم واصل للسما
اول خطوه للخروج من الاكتئاب انك متفضلش في سريرك مده طويله
ابعد عن الناس اللي ممكن يكلموك في نفس المشكله اللي مديقاك
كلم الناس اللي انت عارف انك بتضحك معاهم وبتتبسط
اسمع مزيكا حلوه تخليك في مود حلو
انزل شغلك وغرق مخك فيه عشان ميبقاش عنده وقت يفكر في اي حاجه وحشه
انزل هات لنفسك هديه حلوه كانك بتكافاها وبتصالحها وبتقولها انتي متستهليش غير كل حاجه حلوة
ابعد عن اي حاجه تفكرك بسبب المشكله الغيها خالص من حياتك اقطع وامسح اي حاجه عينك لو شافتها تفتكرك بالمشكلة
واعرف اننا طول ما احنا عايشين ان دي مش اخر مشكله ومش اخر جرح ومش اخر حزن السعاده الخالصه موجوده بس في الجنه مش موجوده في الدنيا ولو موتنا نفسنا علي كل حاجه بنتعرض ليها او بتقابلنا هنموت ناقصين عمر
واهم حاجه هقولها ودي الخلاصه ومن الاخر
الصلاه
الصلاه
الصلاه
اكبر علاج للحزن والهروب من الاكتئاب
ربنا يريح قلوبنا جميعا
