رمضان2020تاريخ ميلاد نجم اسمه ميدو فايد
بقلم ريهام طارق
ميدو فايد نجح في تجسيد دور الإرهابي باحترافيه في مسلسل كلبش و آثار غضبنا الإختيار جعلنا نبكي وامتلك قلوبنا بعد تجسيده دور الشهيد مؤمن رزق ابو اليزيد
احد شهداء موقعه البرث باداؤه المتميز وإحساسه العالي وملامحه المصريه وذكائه الفني وموهبته القويه
وكان هذا حواري مع النجم ميدو فايد وجهت إليه بعض الاسئله وجاوب عليها بمنتهي البساطة والتلقائيه وخفه الظل
س_ امتا حسيت أول مرة بحبك للتمثيل؟
ج_ من طفولتي لما ابتديت أمثل علي مسرح المدرسه ومنها الي عروض قصور الثقافه.
س_ حكايتك إيه مع كره القدم وياتري حبك للتمثيل هو إللي بعدك عن الملاعب؟
ج _أنا كانت هوايتي الوحيده كره القدم وأنا عندي خمس سنين وكنت مجنون كوره لدرجه اني كنت بنام ولبس الكوره في حضني وكنت بنتمي لأحد النوادي الكبري وكنت واحد من الناشئين في النادي إلي أن أصبت وبعدها بعدت عن الملاعب
س_ من هي الشخصيه آلتي تدين لها بالفضل في حياتك؟
ج_ أولا الله سبحانه وتعالى وبعده أبي وأمي وشخصيات كثيره ساعدتني واكتشفتني وقدمت لي مساعدات كثيره من أول مشواري الفني.
س_ امتا تم اكتشافك وازاي تم ترشيحك للعمل في الإختيار؟
ج_تم اكتشافي ولفت نظر الجميع علي مسرح الجامعه وأول أعمالي كانت في فرق حره أول دور عملته كان مميز جدا وهو تجسيد شخصيه صدام حسين في مسرحيه قراصنة بابل والدور نجح جدا ولاقي استحسان من الجميع وكانت لحظه مهمه في حياتي وقررت الاحتراف الفني وبالفعل التحقت بالمعهد العالي للفنون المسرحيه وكانت أول خطوه في حياتي الفنيه اشتراكي في مسلسل حكايات بنات الجزء الأول مع باقه من ألمع النجوم صبا مبارك ودينا الشربيني وكريم فهمي وحوريه فرغلي وكانت بدايه نقطه تحول بعد نجاحي في العمل بعدها تم ترشيحي لمسلسل كلبش الجزء الثاني مع النجم امير كراره وبفضل الله نجح الدور جدا وترك علامه مميزه للمشاهد وأصبح ترند في هذا الوقت وكان سبب من اسباب ترشيحي من المخرج العبقري الدكتور بيتر ميمي لتجسيد شخصيه الشهيد مؤمن في مسلسل الاختيار الجزء الاول رمضان 2020
س_مخفتش وأنت بتقرأ الدور خصوصا أنها شخصيه واقعيه وحتكون أكيد في مقارنه بينك وبين الشهيد وكانت إيه ادواتك لدراسه الشخصيه؟
ج_ احساسي ماكنش خوف اكتر ما كان قلق لأني كنت مهتم اني اطلع شبهه جدا كروح وشكل واستعنت بأسره الشهيد واصدقائه المقربين وزملائه الابطال الذين شهدوا الوقعه الحقيقيه .
س_ تفتكر إيه السبب الحقيقي في نجاح العمل؟
ج_ سبب نجاح العمل أنه كان واقعي جدا وكل الناس كانت شغاله بقلب رجل واحد.
س_ لو أعيد ترتيب الأدوار إيه الدور إللي نفسك تجسده؟
ج_ سوال ذكي جدا بس الحقيقه أن كل الأدوار بطوله من وجهه نظري من أصغر دور الي البطل والحمدلله الكل جسد دوره باحترافيه كامله ونجاح بدليل أنه وصل لقلوب الناس ونجح جدا
س _شايف الدراما المصريه فين الفتره القادمه؟
ج_ لو استمرينا بإنتاج أعمال بنفس النوعيه والمستوي الهادف الراقي إللي قدمه المنتج تامر مرسي سنتربع علي عرش الدراما من جديد وسنستعيد المرتبه الأولي كعهدنا دائماً.
س_ إيه أكثر المشاكل التي واجهتكم في التصوير؟
ج_ أن معظم التصوير كان في الصحرا ودا كان مرهق جدا خصوصاً أننا كنا في شهر رمضان وكلنا كنا صايمين؟
س _أكثر المواقف الكوميديه لك في التصوير؟
ج_ كنت ماسك سلاح وفجاه ضرب وفي أقل من ثانيه كان كل اللي حواليا جري.
س_ من هو قدوتك الفنيه؟
ح_ بالنسبه للنجوم العربيه الأستاذ عمر الشريف والنجم الكبير عادل امام واستاذنا فؤاد المهندس وعبقري الكوميديا عبد المنعم مدبولي والراحل العبقري الاستاذ أحمد ذكي و بالنسبه للنجوم العالمين الباتشينو ويل اثميث توم كروز.
س_ مين إللي حلمك تقف ادامه في عمل يجمع بينكم؟
ج_كل النجوم العربيه فعلاً مش مجامله بس حلمي الحقيقي أقف أمام النجم الباتشينو
س_ مين البطله إللي بتحلم يجمعك بيها عمل فني؟
ج_ يسرا بلا منازع.
س_ من وجهه نظرك إيه أكتر عمل ناجح في رمضان 2020؟
ج_ الإختيار طبعاً.
س إيه حلمك إللي اتحقق والحلم إللي بتشتغل عليه والحلم إللي بتستناه؟
ج_ أنا شايف أن لسه حلمي متحققش وحلمي اللي بشتغل عليه إني أسمي يكون علامه في الفن العربي ويوصل للعالميه.
س_ كلمه تقولها لكل من تامر مرسي بيتر ميمي امير كراره!!!!!
ج_ أقول لتامر مرسي أنت إنسان محترم واعي مثقف بتساعد علي ضخ دم جديد للسينما والدراما ومافيش غيرك أنت إللي يمتلك الجراه لعمل ذلك ومعاك أعمالنا حتوصل لكل المهرجانات العالميه. واتمني لك كل النجاح والتوفيق
*اقول لبيتر ميمي أنت مخرج دارس وفاهم عبقري ودايما بتفكر برا الصندوق مش نمطي عندك ثقافه ووعي كامل بتتعب أوي وبتحب شغلك ودا سر نجاحك.
*أقول للنجم أمير كراره ألف مبروك نجاحك امير أخ محترم اخلاقه عاليه متواضع وكان شرف ليا إني أقف ادامك.
س_ مين اكتر شخصيه قربت منها في العمل وربط بينكم علاقه قويه؟
ج_ كلهم صحابي وأخواتي و كلنا خرجنا من العمل فعلاً أسره واحده بينها ترابط وحب واحترام.
س شايف نفسك فين بعد خمس سنين؟
ج_ شايف بوستر لفيلم ضخم هادف قوي من بطولتي.
س_ لو أتعرض عليك فيلم وليك حريه اختيار المخرج البطله نوعيه العمل اكشن رومانسي اجتماعي حتختار إيه؟
ج المخرج خيري سالم أو سامح سالم أو احمد فهمي أو سامح الشوادي وطبعا بلا تردد وتفكير الدكتور بيتر ميمي أما بالنسبه البطله حتختارها تناسب الدور كروح وشكل وأداء افضل وأن يكون اكشن يناقش قضيه اجتماعيه ومحوره قصه حب.
س _اخيرا رأيك في مهرجان جمال الاطفال
Egypts beauty pageants?
ج_ شايف أنه حيكون من أقوي المهرجان الخاصه بالاطفال بمصر وفي فتره قصيره جدآ حيكون رقم واحد في الوطن العربي وراي أن رئيسه المهرجان المهندسه ريهام طارق من الشخصيات المتميزه والمجتهده جدا وبتقوم بمجهود كبير لإنجاح هذا العمل وحبها الشديد للاطفال هو السبب الرئيسي وراء هذا النجاح وفرحت جدا لما عرفت أن اداره المهرجان رشحتني من ضمن الشخصيات الفنيه التي سيتم تكريمها في المهرجان
