وباء التريند المستجد 2020
بقلم. سالى فايز البرى
فى برنامج رمضانى تم اذاعته فى رمضان الماضى اسمه شيخ الحاره و الجريئة
طبعا البرنامج كان مكون من عدة فقرات
و لكن ال استوقفني فيه هو الفقره الاخيره من البرنامج
فى الفقره دى المذيعه كانت بتسأل الضيف سؤال السهل الممتنع
كان السؤال كالاتى
من وجهة نظرك ايه هو الأسوء من الكرونا
طبعا أغلب الضيوف كانت اجابتهم واحده
اغلبهم ان لم يكن جميعهم اتفقوا ان مفيش اى حاجه خالص فى مجتمعنا ممكن تكون أسوء و أخطر من الكرونا على المجتمع
لكن الحقيقه تخيلت نفسى لو كنت ضيفه فى البرنامج ده و سؤلت نفس السؤال هتكون لى اجابه مختلفه تماما
لان من وجهة نظرى فى حاجات كتير جدا فى مجتمعنا أسوء و أشد خطرا ليس من الكرونا فقط بل الكرونا و الكوليرا و الطاعون و أخطر من اى وباء
اسمحولى القى الضوء على وباء م ضمن هذه الاوبئه اللعينه
انه وباء التريند
موضوعى هو الوجه السىء و القبيح لهذا المصطلح الذى بكل أسف أساء استخدامه الكثير
وباء التريند جعل شباب يلجئون لغناء أغنيات تحمل كلمات فجه و صادمه اخلاقيا و تلوث اذن من يسمعها و تحمل إيحاءات جنسيه أو ذكر أنواع المخدرات أو كلمات نابيه عشان يبقى تريند… و للاسف فعلا بيبقى تريند
التريند ده هو ال جرء كتير جدا من الزوجات على فضح أزواجهن و إفشاء أسرار زوجيه على تطبيقات الانترنت المتنوعه و المقابل تبقى تريند و اكيد العكس صحيح
نفس التريند ده الى جعل واحده تقرر كده تعمل تصرف ضد العادات و التقاليد و و المألوف و تسبح ضد التيار و تعرض نفسها للزواج عن طريق عمل بث مباشر من صفحتها ع القيسبوك و تقول اسمها و سنها و انها عارضه نفسها للزواج و طبعا كانت تريند من ضمن التريندات السخيفه
طبعا غير غموم التيك توك لان رافضه اقول عليهم نجوم معروف النجمه بتنور ف السماء لكن النماذج دى ضلمت حياتنا لدرجة العتم
لما شباب و بنات يتنفسوا فى خلع الملابس و الحركات المثيره و الألفاظ النابية مقابل انهم يبقوا تريند أو ابطال التيك توك
و بلاوى التريند موقفش لحد كده و بس لا ده بقى تريند مالوش سقف و لا كبير لدرجة ان جعل اناث تطلع تتباهى و تقول مش عاجبنى اكون بنت و هتحول لذكر و مع العلم معنديش اى خلل هرمونى كما أشيع عنى عشان تبقى تريند و الأغرب أن والدها الفنان الشهير يطلع فى اكتر من برنامج و يقول ايوه بنتى نور أصبحت ابنى نور أو خلاص هتتحول و دى رغبتها و هى حره فيها
مش دى المصيبه لان البلوه الأكبر ان بعدها ظهر عدد من الشباب الذكور قالو عايزين نبقى اناث و العكس صحيح و طبعا كله بقى تريند
و بقى الموضوع زى ما يكون المضيفه ف الطياره بتسأل لحم و لا فراخ فتختار براحتك و ممكن تغير كمان
بقى بسبب التريند أشخاص معندهاش مانع تغير نوعها عشان تبقى تريند و طبعا كلامى واضح ان ده بدون داعى طبى أو اى خلل هرمونى مجرد مزاج مش اكتر و هواية ركوب التريند
طبعا و من الجدير بالذكر فضايح الفنانين لبعض أو ان شخص يفضح أخته الفنانه المشهوره جدا لمجرد أنها ارتبطت بفنان شاب زميل لها بعد طلاقها و برضو عشان يبقى تريند
الكائن الغريب سماالمصرى انا شخصيا زى جميع من يعرفها لا اعرف من هى وظيفتها
هى شويه تظهر انها مذيعه و بعدها عضو مجلس شعب يليها راقصه يليها داعيه و ف الاخر صاحبة صفحه للفجور و الحقيقه كل ده وجوه متعدده لهدف واحد و هو التريند
و كثير و كثير من البالوعات العفنه التى طفحت علينا تحت مسمى التريند
اتمنى اننا نحذر من وباء التريند المتفشى
لانه اقسم بالله العظيم حقا أخطر و أشد فتكا من الكرونا على المجتمع بأكمله
