صديقتي نجمه سينمائيه..
فى الواقع هى ليست نجمه..
هى نصف معروفه وربع موهوبه..ولكن ان يتسنى لمتوحد مثلي يعيش فى بلد نائى انه يعرف ممثله..فهو أمر مثير.
بدايتها منذ سنوات بعيده..
بعد سفرها للإقامة بالقاهره بأشهر.. أتت..
تقابلنا بكافيه وبعد المقدمات المعتاده والسؤال عن الاخبار.. فتحت الموضوع:
– محمد..عاوزه اطلع باسبور.
تعجبت قائلا:
– خير؟ مسافره اكيد.
– اهه.
-مسافره الإمارات.. صح؟
ظهر الارتياب واضحا فى صوتها وهى تسألنى:
-اه صح. عرفت منين؟
اجبت عن سابق تجربه:
-طبيعي يا حبيبتى..كل المزز اللى اعرفهم بيسافروا الإمارات.
ضحكت بمياعه وأرتضت اجابتى على اساس انى اعتبرتها من المزز ..
ثار فضولى فسألتها:
-بس رايحه تعملي ايه هناك؟شغل ولا سياحه؟
فاجأتني اجابتها الواثقه:-
-عندى تصوير.
اندهشت. ولم افهم.. فعاودت السوأل:
-تصوير ايه يا بت؟ انتى هتمثلي؟
اجابت بطريقتها فى الشد على الحروف:
-اييييون.
_ ازاى؟.. انتى شكلك اه كويس.. بس عمرك ما كان عندك اهتمام اصلا بالفن..وحتى مسلسلات رمضان مكنتيش بتتفرجى عليها.
سحبت نفسا طويلا من مشروبها المفضل ” شيشه تفاح”ونفثت دخانها فى وجهى ..أشتممت رائحه أنفاسها مع الدخان المتسلل لأعصابي ..فأنتشيت..واقتنعت قبل أن تحكى..
ثم حكت قائله:
-يا بنى الموضوع ملوش علاقه لا بموهبه ولا غيره..الموضوع علاقات وشكل..انت عارف انى عايشه ف القاهرة بقالي فتره..اتعرفت بمساعد مخرج صاحب اخويا..كلمه ف حدوته جابلي الدور..أخدت كام كورس تمثيل وحضرت ورش.. واتعملى اختبار وقبلونى..عاوز تقول واسطه.. ماشي.المهم لازم اطلع البسبور بسرعه علشان الحق اسافر معاهم.
رديت ساخرا :
-بس اوعى يا بت يسفروكى بره تشتغلى ف حاجه بطاله..زى ما بيحصل ف الأفلام.
ابتسمت قائله:
-متخافش.. وانت تعرف عنى كده؟ ده انا اقلعلهم ملط ف الشارع.
سكت..فما اعرفه عنها هى انها تستطيع أن تفعلها .. بجانب انها شخصيه محترمه وشجاعه لا تقبل اهانه..على الاقل تمتلك الجرأه وهى من مكونات الممثل..قد تنجح.. ولم لا؟
وقلت لنفسي..أما نشوف.
ساعدتها فى استخراج جواز السفر ..ثم سافرت للقاهره و غابت أخبارها لشهور طويله فنسيت الموضوع كله..حتى تفاجأت بوجهها المألوف بأحد المسلسلات فى دور على الهامش.. فعرفت انها بدأت طريقا جديدا بحياتها.
يتبع……
عدد المشاهدات : 56
مرتبط
