التفاصيل الكاملة والشرح المفصل لكل اللي هيحصل من الابتدائية للثانوية العامة.
أسماء وحيد
التفاصيل الكاملة والشرح المفصل لكل اللي هيحصل من الابتدائية للثانوية العامة:
أولا: صفوف النقل
= زيادة درجات أعمال السنة إلى 40% من مجموع الطالب.. موزعة على الحضور والسلوك والواجبات المنزلية والاختبارات الشهرية.
ثانيا: المرحلة الإعدادية
= مفيش أي تغيير.. والصف الأول الإعدادي فقط هو اللي بمناهج جديدة.. واللغة الأجنبية التانية هتكون خارج المجموع في أولى إعدادي (ده للي لسه هيدخل أولى إعدادي).
ثالثا: المرحلة الثانوية
= مبدئيا.. اللغة الأجنبية الثانية والجيولوجيا وعلم النفس خارج المجموع لكل الصفوف الثانوية.
= الصف الأول الثانوي المواد بتاعته هتكون 6 مواد بدل 10 مواد.. والست مواد هم: العربي والإنجليزي والتاريخ والرياضيات والعلوم المتكاملة (فيزياء على كيمياء) والفلسفة والمنطق. وأي مادة تانية خارج المجموع
= إعادة تصميم مادة الرياضيات لتكون مادة واحدة بعد دمج كل فروعها في مادة واحدة.
= الصف الثاني الثانوي.. المواد اللي هيدرسها الطالب ست مواد دراسية فقط بدل من ثمانية.. وبالنسبة للشعبة العلمية في تانية ثانوي الطالب هيدرس (اللغة العربية – اللغة الأجنبية الأولى – الرياضيات – الأحياء – الكيمياء – الفيزياء)، وده في العام الدراسي الجديد.. أما اللي لسه هيدخل أولى ثانوي وبعدها يطلع تانية علمي في العام الدراسي بعد المقبل (2025 – 2026).. هيدرس التاريخ بدل من الأحياء في العامين الدراسيين المقبلين.
= الصف الثاني الثانوي أدبي للعام الدراسي الجديد هيدرس (اللغة العربية – اللغة الأجنبية الأولى – التاريخ – الجغرافيا – علم النفس – الرياضيات).
= الصف الثالث الثانوي.. الشعبة العلمية هتدرس (اللغة العربية واللغة الأجنبية الأولى والأحياء والكيمياء والفيزياء) وخروج مادتي اللغة الأجنبية الثانية والجيولوجيا من المجموع.
= شعبة الرياضيات هتدرس: اللغة العربية واللغة الأجنبية الأولى، والرياضيات والكيمياء والفيزياء، وخروج مادتي اللغة الثانية والرياضيات التطبيقية من المجموع.
= الشعبة الأدبية هتدرس: اللغة العربية واللغة الأجنبية الأولى والتاريخ والجغرافيا والإحصاء، بعد خروج مادتي علم النفس واللغة الأجنبية الثانية من المجموع.
= الكلام ده هيطبق العام الدراسي الجديد.. علشان تظبط دروسك وتعرف إيه الكتب الخارجية اللي هتشتريها أو تستغنى عنها.
= تخفيف المناهج لمختلف المواد في جميع الصفوف الثانوية الثلاثة للعام الدراسي الجديد والسنوات الدراسية المقبلة.. يعني المادة الموجودة هتتخفف ويتشال الحشو اللي فيها، والمفاهيم اللي طالب أخدها في أولى وتانية لنفس المادة مش هتكون موجودة طالما أخدها قبل كده.
= امتحانات الثانوية العامة للعام الدراسي الجديد، لأي صف في الثانوية العامة، هي نفس طريقة امتحانات العام الحالي يعني لا فيه تراكمية ولا تحسين.. وكل حاجة زي ما هي.
= عدد أسابيع الدراسة السنة اللي فاتت كانت 23 أسبوع السنادي العام الدراسي هيطول وهيبقى 31 أسبوع علشان الطلبة متقعدش في البيت كتير.
= بالنسبة لعجز المعلمين.. هيكون فيه 30 ألف معلم تعيين جديد قبل بداية الدراسة.. هيكون فيه 50 ألف معلم بالتعاقد وسعر الحصة الواحدة 30 جنيه وكل معلم هياخد 24 حصة في الأسبوع إضربهم في 30 جنيه.. هيكون فيه مد فترة الخدمة لمعلمين هيخرجوا على المعاش.. يعني في حدود 100 ألف معلم جدد.
= بالنسبة لمشكلة الكثافة.. مدارس الثانوي هتبقى مسائي.. ومدارس الإعدادي هتروح صباحي في مدارس الثانوي.. ومدارس الإعدادي لما تفضي هيروح فيها مدارس ابتدائي.. وممكن تلاقي ابنك بقى في مدرسة تانية فيها كثافة أقل.. أو تلاقي ابنك بقى فترة مسائية في مدرسة تانية.. أو تلاقي ابنك بقت مدرسته جوه معهد أزهري فترة صباحية أو مسائية.. يعني المدرسة اللي موجود فيها ابنك السنادي وارد متكونش هي السنة الجاية.. علشان الكثافة.. ده ملخص الحلول اللي الوزارة هتعملها.. وأي فصل على مستوى الجمهورية كثافته مش هتكون أكتر من 50 طالب.. هكذا وعد الوزير.
= بالنسبة لمصروفات المدارس الخاصة.. نفس شريحة الزيادة بتاعت السنة اللي فاتت في مدرستك هتكون هي هي السنة الجديدة بدون زيادة.. يعني لو مصاريف ابنك زادت السنة اللي فاتت 10% هتزيد السنة الجديدة 10%، وهكذا.. الوزير قال مش هنرفع شرائح زيادة المصاريف.
= تخفيف المناهج لتكون مناسبة باليوم لعدد أيام الدراسة طوال السنة، في أي صف دراسي، أيا ما كان الصف والمناهج بتاعته.
= زي ما قلت الشهادة الإعدادية كما هي بدون تغيير.. والامتحانات بتاعتها كما هي.. على ترمين مش تيرم واحد.. والتغيير كله في الثانوية العامة.. مناهج ومواد فقط.. مش تغيير في الامتحانات.
= أي مادة مش موجودة في توزيعة مواد أولى وتانية وتالتة ثانوي.. تبقى مش موجودة خالص.. أحياء مش موجودة في أولى ثانوي تبقى مش هيتم تدريسها.. جيولوجيا مش موجودة في الصف كذا يبقى مش هيتم تدريسها، لأنها مش موجودة من الأساس، وهكذا لأي مادة.
= كل ما سبق هيتطبق من العام الدراسي الجديد ٢٠٢٤- ٢٠٢٥.
= ده ملخص اللي هيحصل في العام الدراسي الجديد من الابتدائية للثانوية.
